Auzolanean egin da Ibilaldiko horma-irudia Bilboko Ikastolaren sarreran
Ikasturteari amaiera borobila emateko, Auzolan eguna izan zen Kirikiño Ikastolan, eta datorren urteko Ibilaldia izan zen protagonista nagusia, Kirikiño Ikastolak antolatuko baitu 2026ko Bizkaiko ikastolen jai handia.
Ehun bat guraso, ikasle, langile eta lagun batu ziren Ikastolan Ibilaldia 2026ko horma-irudia margotzeko eta giroa bikaina izan zen. Kolore biziek eta irudi alaiek betetzen dute murala. Leloa, HIRI KIRIBILI BIL, erdigunean dago, eta logoa osatzen duten patineteek apaintzen dute horma-irudia.
Ikastolaren sarreran egonda, ikasturte berriari ongietorria emango dio irudiak eta Ikastolako komunitatearen ilusioa piztuko du ikasturte osoan. Horma-irudiaren bidez, denok izango dugu gogoan 2026ko maiatzaren 31n Ibilaldia ospatuko dugula gure Ikastolan eta alaitasunez, gogoz eta indarrez ekingo diogu erronkari. Ibilaldia antolatzea lan handia da, baina Kirikiño Ikastolaren komunitatearen ilusioa, are handiagoa.
Auzolan egunaren argazki gehiago Kirikiño Ikastolaren webgunean daude eskegita. Ikusi Jordi Alemany argazkilariak egun horretan ateratako argazkiak.
Eskerrik asko parte hartu zenuten guztioi, artista hutsak zarete!
