Otsailaren 4an eta 8an batuko da Kirikiño Ikastolako komunitatea Euskal Herriko ohiturak sustatzeko
Euskal Herriko ohiturei eutsiz, Kirikiño Ikastolako komunitatea kalera aterako da beste urte batez otsailaren 4an, Agate deunaren bezperan, eta Txitxiburduntzi eguna prestatu du otsailaren 8an.
Agate deunaren aurreko egunean, denok batera, txistua eta danbolina lagun izanik, eta makilak eskuetan, Santutxuko kaleetan barrena murgilduko dira, auzoko giroa alaitzen eta abesten. Ibilbidea Basarrate plazan hasiko da 18:00etan eta apurka-apurka Karmelo plazara gerturatuko dira kantariak.
Bidean, hainbat geldialdi egingo dira Santa Agedako kopla kantatzen eta makilak lurraren kontra joz, lurra neguko lozorrotik esnatzeko helburuarekin. Karmelo plazan, denok elkarrekin txokolateaz gozatu ahal izango dute giro ezin hobean. .
Txitxiburduntzi eguna
Hurrengo igandean, otsailaren 8an, Kirikiño Ikastolak Txitxiburduntzi eguna antolatu du, Komunitatearekin egun ederra igarotzeko asmoz. Hitzordua Txomin Garat etorbideko autobus geltokian izango da, 9:30ean. Bertan, autobusa hartu eta Galdakaora abiatuko dira bertaratutakoak, Eguzkibegi Ikastolara, hain zuzen. Modu horretan, Kirikiño Ikastolak gogoratuko du Eguzkibegi Ikastolan jaso zuela 2026ko Ibilaldia prestatzeko lekukoa joan den maiatzean.
Ibilbidea 9,5 kilometrokoa izango da, Eguzkibegi Ikastolatik Kirikiño Ikastolara eta 13:30ean Kirikiño Ikastolan merezitako atsedena hartuko dute parte-hartzaileek eta txitxiburduntziaz gozatu ahal izango dute.
👉 Animatu eta izena eman esteka honen bidez!
