Ibilaldia 2026ren abestia martxoaren 3an aurkeztuko da Bilboko Arriaga Antzokian eta sarrerak salgai daude jada
Ibilaldia 2026ko kantaren egile eta interpreteen izenak ezagutzera eman dira, eta edizio honetako une esanguratsuenetako bat izango den aurkezpen-ekitaldia martxoaren 3an ospatuko da, 19:00etan, Bilboko Arriaga Antzokian. Aurtengo abestia Kirikiño Ikastolako ikasle ohiek sortu dute, gaur egun euskal musikaren erreferente diren hiru taldetako artistek: Aiora Renteriak (Zea Mays), Unai Madariagak (EZEZEZ) eta Jon Fernándezek, Andoni Barinaga-Rementeriak eta Iñigo Guemesek (Txopet).
Ikastolaren komunitateak sortutako proiektu honek belaunaldien arteko lotura eta konpromiso partekatua azpimarratzen ditu. Aurkezpen-ekitaldian, gainera, Kirikiño Ikastolako ikasle ohiek izango dute protagonismo osoa: Imanol Ituiño magoa, eta Amaia Usandizaga eta Ainhize Vega kazetariak izango dira aurkezle lanetan. Ekitaldian gaur egungo hainbat ikaslek ere parte hartuko dute, bai dantzan, bai kantaren bideoklipean, bai ekitaldian aurkeztuko diren beste emanaldi batzuetan ere.
Kirikiño Ikastolaren ordezkarien esanetan, “ohore handia da Ibilaldiko kanta eta ekitaldia gure ikasle ohien talentuarekin osatzea; gure komunitatearen indarra eta jarraikortasuna islatzen ditu”.
2026ko Ibilaldiko abestiaren aurkezpenaren xehetasunak
- Data: martxoak 3, asteartea
- Ordua: 19:00
- Lekua: Arriaga Antzokia (Bilbo)
- Sarrerak: Arriaga Antzokiko ohiko txarteldegietan, aurrez aurre zein online, esteka honen bidez
Prezioak:
- Nagusiak: 5 €
- Adingabeak: 3 €
Sarrerak gaurtik aurrera daude eskuragarri, eta antolakuntzak gogorarazi du Ibilaldia 2026ren prestaketa fase erabakigarrian sartuta dagoela. Maiatzaren 31ra arte, 2026ko Ibilaldia ospatuko den egunera arte, alegia, Kirikiño Ikastolak antolatutako ekimen ezberdinetan parte hartzeko gonbitea luzatu die herritar guztiei.
