Ehunka lagun batu dira Kirikiño Ikastolaren kilometroan euskara bultzatzeko
Hamaika egunez Euskal Herriko bazterrak zeharkatu ondoren, 24. Korrika Bilbora iritsi da. Goizeko hamaikak aldera hartu dute lekukoa Kirikiño Ikastolako LH2ko Ishan Lamalam eta Batxilergo bigarren mailako Libe Iturbide ikasleek "Kiriki"rekin batera, Txurdinagatik Santutxurako bidean. Atzetik, ehunka lagun eta familia izan dituzte, denok euskararen alde.
Bertaratutakoek giro bikaina bizi izan dute, pozik eta alai, korrika, euskara ahoan eta 2026ko Ibilaldiko kamisetak jantzita. Hala, bada, HIRI KIRIBILI BIL lelodun kamiseta eta zapi ugari ikusi dira Bilbon Korrikaren azken egunean.
Euskara gara
Aurtengo Korrikaren leloa “Euskara gara” izan da, eta Euskal Herriko zazpi gazteren artean idatzitako mezu kolektiboa, argia: “Euskara gara eta hemen gaude. Hemen gara eta euskaraz gaude. Aurrera goaz. Bazatoz?”
Euskaraz aritzeko gonbita ez da faltako datozen hilabeteotan Kirikiño Ikastolak Ibilaldiaren atarian antolatuko dituen ekimenetan, ezta egun handian ere. 2026ko Ibilaldia maiatzaren 31n ospatuko da Bilbon, eta beste behin Bizkaiko hiriburua euskaltzaleen bilgune izango da.
